阿史之前介紹咗「中國氫彈之父」于敏、「中國衛星之父」孫家棟、「戰鬥英雄」李延年等共和國勛章獲得者嘅事蹟，今次就介紹吓另一位勛章獲得者申紀蘭嘅故事。申紀蘭由1954年當選第一屆人大代表開始，一直連任至今，係唯一一位連任十三屆嘅人大代表。但唔講唔知，佢年輕嘅時候曾經為婦女爭取平等權益、鼓勵婦女勞動，付出過唔少功勞。

申紀蘭生於山西省平順縣山南底村，抗戰期間佢就做過村內紡花織布小組組長，之後佢嫁到西溝村，積極參加勞動。1951年西溝村成立初級農業合作社，申紀蘭出任副社長，當時男女同工不同酬，男人做一日嘢就可以記10個工分，但婦女就只可以記5個工分，申紀蘭對此好不滿，認為做法係削弱婦女勞動嘅積極性，寧願留喺屋企做家頭細務都唔願意勞動，阻礙婦女提高地位。

於是申紀蘭就拜訪各家各戶，向婦女宣傳「勞動才能獲得解放」嘅道理，又爭取男女同工同酬，起初好多男社員都唔同意申紀蘭嘅主張。申紀蘭認為，只有做出成績，婦女先唔再受到歧視，於是佢就向合作社申請劃出一塊地俾女社員，同男社員進行勞動競賽，最後女社員唔怕辛苦、努力工作，贏得競賽，越來越多男社員就「轉軚」支持男女同工同酬。

喺1952年，西溝村實現男女同工同酬，到咗1954年9月舉行嘅第一屆全國人民代表大會，申紀蘭提出嘅男女同工同酬就被寫入中國憲法裡面。

圖片為申紀蘭參加第一屆全國人民代表大會，取自網絡。