阿史有時去旺角,都會行天橋來往旺角站同旺角東站,途中會經過洗衣街,自不然會諗下,以前呢度係咪有好多洗衫鋪,先至叫「洗衣街」呢?話說以前洗衣街呢度原本係芒角村嘅一條小溪,附近嘅村民都會嚟呢度攞水灌溉。

到咗上世紀20年代,芒角村啲農田被夷平用嚟起樓之後,就開始多人嚟呢條溪洗衫,甚至有住喺附近嘅婦女會透過幫人洗衫賺錢維生。佢哋會上門攞啲衫,然後嚟呢條溪度洗衫,洗完晾乾、燙好之後,又會將啲衣物送返去。由於呢條溪有唔少婦女喺度洗衫,於是附近啲街坊就稱溪邊嘅一條小徑做「洗衣街」喇。

直到30年代初,政府截斷咗呢條小溪嘅水源,以興建下水道,又將洗衣街擴闊成為街道。雖然自此呢度再無水俾人洗衫,但「洗衣街」呢個名稱就一直沿用至今。

原圖取自網絡。