介紹完「中國衛星之父」孫家棟、「中國氫彈之父」于敏等等中國科學家,又點可以唔講吓中國航天科學奠基人錢學森呢?錢學森早年曾經响美國讀書、工作,直至上世紀50年代佢想返中國,點知被美國阻撓,經過兩國交涉,錢學森終於可以如願返回中國,返國後錢學森大力推動中國航天科技發展,功不可沒。

錢學森1911年生於上海,1929年考入上海交通大學機械工程系,畢業之後佢考獲清華大學庚款留美名額去美國留學,佢先去到美國麻省理工學院航空系讀書,一年之後就轉去加州理工學院,並師從美國空氣動力學專家馮‧卡門研究火箭技術。畢業之後,佢留喺美國執教,1947年更成為麻省理工學院最年輕嘅終身教授,同時佢亦出任美國政府顧問,獲准自由出入美國國防部五角大樓。

直至50年代初,錢學森希望返回中國,但被美國阻撓,甚至一度被囚禁同監視。消息好快傳到中國,中國政府發表聲明,譴責美國監禁錢學森,其後時任總理周恩來竭力同美國進行外交談判,中方同意釋放11名喺韓戰中被俘虜嘅美軍飛行員,以換取美方釋放錢學森。1955年9月17日,錢學森終於帶埋妻兒登上克利夫蘭總統號輪船,踏上回國之路,並於當年10月8日經香港返回中國。

錢學森回國之後,中國成立第一個導彈研究機構──國防部第五研究院,並委任錢學森出任院長,領導中國火箭、導彈同航天事業嘅研發工作。1986至1998年間,錢學森出任全國政協副主席,並擔任當時解放軍總裝備部科技委高級顧問。十年前嘅今日(31/10),錢學森喺北京逝世,享年98歲。

原圖取自網絡。