宜家電影、電視劇拍完嘅時候叫「殺青」，預示結束、完結，但點解叫做殺青呢？原嚟同古代人用竹簡書寫有關。

《後漢書》載，殺青係「以火炙簡令汗，取其青易書，復不蠹，謂之殺青，亦謂汗簡」。所以唔少人以為殺青就係汗簡，但其實殺青係講新竹變成竹簡嘅最後一道工序。喺紙未出現嘅年代，古代用竹嚟記錄文字，但新鮮嘅竹仲未可以即時用嚟寫字，要經過打磨，再用火烤乾竹裡面嘅水分，水分被火逼出嚟，好似竹流緊汗咁，呢個就叫汗簡。

處理完嘅竹理論上就可以寫字嘅，不過竹青嗰面光滑，墨水寫落去好易磨滅，所以就需要殺青嚟刮走啲青皮，咁就可以方便書寫、繪畫喇。另外，喺秦朝嗰陣，人民會先用毛筆將初稿寫喺容易修改嘅竹青上面，等到初稿改好之後就寫落竹白，之後削去竹青，所以「殺青」亦意味住定稿。由於殺青係整成簡牘嘅最後一步，於是後代就將其引申為一件事、作品結束、完成嘅意思。

原圖嚟自網絡。