中國國家羽毛球隊宜家喺世界球壇上具有舉足輕重嘅地位,又點會估到喺上世紀50年代,即使係國家隊裡面嘅全國冠軍,喺國際公開賽事上都係被對手逼到幾乎毫無還手之力。而中國羽毛球技術開始迅速發展、崛起,就要由印尼華僑王文教講起……

王文教祖籍福建,係19世紀50年代印尼家傳戶曉嘅羽毛球明星。1953年,佢隨印尼隊去天津參加全國四項球類運動會,同中國羽毛球隊打咗一場友誼賽。當時王文教嘅對手係中國國家隊嘅全國冠軍,但呢位全國冠軍喺賽場上竟然對王文教毫無招架之力,比分拉開好大距離。王文教由此意識到中國羽毛球同世界頂尖水平之間嘅巨大差距。亦係因為呢次比賽,王文教下定決心將自己所學帶返中國,於是佢不顧印尼政府同家人阻撓,同其他華僑青年毅然簽下「永不回印尼」嘅保証書之後,回到中國。

1956年,回國之後嘅王文教同拍檔陳福壽响福建成立咗第一隊省級羽毛球隊,兩人仲合寫咗一本羽毛球教材,將自己嘅羽毛球技術喺全國傳播普及開去。中國羽毛球水平亦因此迅速提高。不過喺60年代開始,王文教就因傷病纏身,退下火線專心做教練。佢帶領嘅國家羽毛球隊,一共獲得56個單打世界冠軍同9個團體世界冠軍。而王文教執教嘅二十幾年嚟,為國家培養出一大批羽毛球人才,包括楊陽、趙劍華、李永波、田秉毅等頂尖羽毛球手,令中國嘅羽毛球隊喺世界球壇上佔一重要席位。

圖為王文教獲得第十二屆湯姆斯杯賽冠軍,原圖嚟自網絡。