喺鴉片戰爭爆發之前，清軍同英軍就已經發生過多次衝突，當中包括响1839年11月3日發生嘅穿鼻海戰。喺海戰中，英軍出動窩拉疑號同海阿新號兩艘軍艦，面對清廷水師29艘師船，仍然不下落風。

話說响1839年6月，清政府欽差大臣林則徐喺虎門銷煙，為咗令鴉片絕跡中國，要求英國商船出具甘結（即係當時嘅一種保證文書，表示如果無履行諾言，甘願受罰），保證唔會偷運鴉片入中國，一經查出偷運鴉片就會即刻沒收，並且就地正法。當時英國駐華商務監督義律堅拒呢個要求，但實際上義律無權阻止英國商人出具甘結，當時英國商船擔麻士葛號同皇馬薩克遜號船主就違抗義律命令，同清政府簽署甘結。到咗11月3日，皇馬薩克遜號準備去到黃埔港進行貿易，但呢個時候義律就指令窩拉疑號同海阿新號，喺穿鼻洋阻止皇馬薩克遜號駛入港口，當時廣東水師提督關天培亦率領水師出嚟保護皇馬薩克遜號，雙方互相發炮，是為穿鼻海戰。

清廷水師一共出動咗29艘師船，而英軍就只有窩拉疑號同海阿新號兩艘軍艦，清廷水師有數量上嘅絕對優勢，但就不及英軍軍艦船堅炮利。呢場海戰持續咗大約一個鐘，清廷水師有1艘師船被打成碎片、3艘被擊沉，另外有幾艘亦遭到重創，而英軍軍艦就只係受到局部損毀，其後雙方撤退。

原圖取自網絡。