上個禮拜講起1996年嘉利大廈大火，有史友就提醒阿史，1994年嘅石峽尾滙豐銀行分行大火呢宗12屍13命慘劇。事後有分析指，如果當時分行裡面有足夠嘅消防設備，又或者防盜門無鎖實，相信就可以減慢火勢蔓延，職員或許就可以及時逃生。

大火發生响1994年1月10日，一名朱姓男子因為太太離家出走咗幾日，怒氣沖沖咁拎住兩支天拿水去到石硤尾邨一期地下嘅滙豐銀行分行，搵佢太太一位喺分行任職嘅朋友，質問對方佢太太嘅下落，但因為等咗好耐都無回音，佢趕走晒分行內嘅銀行客戶，繼而就倒天拿水放火。

放火之後，銀行職員諗住逃離現場，但因為電力中斷，櫃位同大堂之間嘅電動防盜門反鎖咗，佢哋不斷大叫救命，但因為分行內無安裝自動灑水系統，火勢越燒越大，除咗一名匿喺女廁、用濕毛巾掩住口鼻嘅女職員，其餘12名職員相繼焗死，當中包括一名26歲孕婦。

呢名縱火男子隨即被捕，被控縱火同誤殺，罪成被判監20年，減刑之後响2007年獲釋。呢單12屍13命慘劇發生之後，滙豐銀行之後更換鐵閘，增設緊急裝備，確保斷電都可以開啟。而消防處調查後亦發現，消防系統嚴重不足，以致職員難以逃生、增加消防員救人難度，政府响1997年通過《消防安全（商業處所）條例》，規定商業場所必須安裝自動灑水系統同防火警報等設備。

原圖取自網絡。