國家主席習近平同夫人尋晚（5/11）陪同訪華嘅法國總統馬克龍夫婦一齊遊覽上海豫園，又觀看文化表演。阿史今日就同大家簡單介紹吓豫園嘅歷史。

豫園始建於明代嘉靖三十八年（1559年），萬曆五年（1577年）建成，至今已有將近450年歷史。當時豫園嘅主人係四川布政使潘允端，佢爸爸潘恩官至都察院左都御史、刑部尚書，後來出任南京工部尚書，掌管南方工程建設。1559年潘恩辭官告老還鄉，潘允端就喺自己屋企西面建造園林，孝敬爸爸，取名「豫園」，寓意「豫悅老親」。不幸嘅係，豫園未建成潘恩已經因病離世。而潘允端逝世之後，潘家就開始衰敗，負擔唔起園林嘅修繕同管理開支，到咗明末清初，潘家就將已經荒廢晒嘅豫園分拆出售。

據載乾隆年間，有幾位富商買入咗豫園，用咗20幾年時間，重建三穗堂、萃秀堂、致遠堂、蓮廳、快樓、點春堂等等樓台，又將豫園交俾城隍廟打理。清末年間，豫園曾經受到多次破壞，响第一次鴉片戰爭期間，英軍就曾經佔據豫園用嚟做軍營。咸豐三年（1853年），上海小刀會發動起義，就曾經以豫園嘅點春堂作為指揮部，起義失敗之後清兵曾入內燒殺搶掠，之後更用作為洋槍隊兵營。去到二戰期間，日軍向上海民居投擲炸彈，亦炸中豫園部分建築。

到咗1956年，中國政府就開始對豫園進行大規模修繕工作，回復昔日部分景觀，並於1961年開始對公眾開放。

圖片為上海豫園，取自網絡。