今日係晚清重臣李鴻章逝世118周年。李鴻章作為晚清著名嘅政治人物之一,佢嘅功過備受爭議、褒貶不一。例如佢創辦咗一大批近代新式企業,對中國近代化社會發展起到促進作用;但另一方面,佢又代表清政府簽訂過唔少喪權辱國嘅不平等條約,被稱為賣國賊、漢奸。戊戌變法發起人之一嘅梁啟超,喺李鴻章逝世兩個月後曾經感嘆:「四十年來,中國大事,幾無一不與李鴻章有關係。」

得到晚清名臣曾國藩嘅提攜,加上鎮壓太平軍有功,李鴻章嘅官路可謂步步高升。之後李鴻章又整頓清朝海防,購置外國新式槍炮,加快北洋水師建設。除了軍事設備,李鴻章又陸續派員興辦上海輪船招商局、開平礦務局、上海機器織布局、天津電報局、平泉銅礦、中國鐵路公司、華盛紡織總廠等民用工礦企業,促進清朝現代化建設。

但係,李鴻章代表清廷與西方列強簽訂《煙台條約》、《中法新約》、《馬關條約》、《辛丑條約》等多個不平等條約,令中國要割地賠款、開放通商口岸,甚至淪為半殖民地。就喺簽咗《辛丑條約》嘅兩個月之後,李鴻章病逝,終年78歲。