早兩日,被列為世界文化遺產嘅日本白川鄉合掌村有建築物著火焚燒,雖然事件中無人受傷,亦好彩無損害到當地聚落建築,但就令大家再度關注村落嘅防火問題。阿史今次介紹吓合掌村到底有啲咩咁特別。

合掌村响1995年獲聯合國教科文組織列為世界文化遺產,最特別嘅地方就係呢種「合掌造」建築方式。白川鄉冬天嘅時候會有大量降雪,所以當地人為咗避免積雪壓毀屋頂,就建造傾斜度較大嘅屋頂,等啲雪無咁易積聚,由於屋頂呈「人」字形,就好似兩隻手合掌咁,所以呢種建築就被稱之為「合掌造」。屋頂以茅草搭建而成,茅草嘅使用期限短,所以每隔一排就需要更換茅草,每次有家庭需要換屋頂茅草,啲村民就會走嚟幫手一齊換,所以就被稱為「合掌村」喇。

白川鄉早喺1700年左右已經出現以合掌造方式建成嘅屋,去到1800年左右就演變成今時今日嘅模樣。以前啲村民以養蠶維生,佢哋善用屋頂嘅空間、將屋分成2至4層,又利用屋頂嘅開口引入風同光,營造出適合養蠶嘅環境。到咗上世紀20世紀中期,白川鄉合掌造嘅屋大幅減少,70年代喺白川鄉居民全體同意之下成立「白川鄉荻町村落自然環境守護會」,展開合掌造保育活動,其後1976年白川鄉合掌村成為日本國家重要傳統建築物保存地區,1995年更被列為世界文化遺產。

原圖取自網絡。