上個禮拜日本沖繩首里城發生大火,大部分建築被焚毀,實在令人震驚。首里城係以前琉球王國國王同家族成員居住嘅地方,亦係琉球王國嘅行政、宗教中心,可以話見證住琉球王國嘅歷史;喺二戰期間,首里城亦曾飽受戰火嘅摧殘,直至1992年紀念沖繩回歸日本20週年,先至被修繕復原,希望今次都可以修復到喇。

沖繩舊稱琉球,曾經係一個東亞獨立國家,透過進行海上貿易致富,不過到咗日本明治維新時期,日本實行對外擴張政策,琉球王國就成為日本第一個擴張目標。日本响1872年單方面宣布琉球係日本領土,並設置琉球藩,當時琉球王國派遣使臣向中國清廷求救,但清廷就向日本提出「琉球三分方案」,將琉球北部交由日本管治、南部交由清廷管治,琉球王國只保留中部本島一帶。但由於琉球使臣以死反對,呢個協議最終都冇達成。

1879年日本派官員進駐首里城,將琉球王國國王尚泰同佢嘅妃嬪、官員趕走,琉球王國滅亡,改稱「沖繩縣」。二戰期間,日軍响沖繩同美軍展開激戰,日軍以首里城地下坑道作為指揮基地,於是首里城就成為美軍攻擊目標,令首里城主殿被完全炸毀。日本二戰投降之後,沖繩就由美國統治長達27年,直至1972年先將沖繩歸還俾日本。到1992年沖繩回歸日本20週年之際,官方就根據圖樣同史籍資料重建首里城,2000年首里城更被聯合國教科文組織列入世界文化遺產。

圖片為被美軍炸毀前同重建後嘅首里城,取自網絡。