上個星期簡單講過晚清重臣李鴻章一生嘅功過,無可否認,李鴻章曾代表清廷同當時嘅西方列強簽訂過唔少不平等條約,不過李鴻章亦曾面對外國使者嘅侮辱作出反擊,今日阿史就講一個李鴻章用21個字嘅對聯嚟回敬日本使者嘅故事。

1900年,八國聯軍打到北京,慈禧太后帶住光緒皇帝倉促逃亡,之後命李鴻章做代表同八國聯軍傾數。談判結束後,清廷同聯軍代表舉行記者會,期間,有個日本使臣想羞辱清廷,於是就同李鴻章講日本有個對聯大師之前出咗個上聯,向公眾誠征下聯,但就一直搵唔到好嘅下聯,宜家唯有向對聯發源國嘅大師「請教」。李鴻章一睇個上聯就嬲到震,上面寫住「騎奇馬,張長弓,琴瑟琵琶,八大王,王王在上,單戈獨戰」,擺明就係日本人炫耀國力、諷刺清廷無能嘅上聯,意思係清廷對八國聯軍無符,仲話即使得一個國家都足以令清廷投降。

李鴻章嬲還嬲,亦諗咗個下聯嚟還擊:「倭人委,襲龍衣,魑魅魍魎,四小鬼,鬼鬼犯邊,合手擒拿!」暗諷日本萎靡不振,不過係「魑魅魍魎」,但就妄想侵襲大清,如果日本再鬥膽進犯,就即刻合手將佢擒拿。在場嘅中國人見到呢個下聯無不拍手叫好,日本使臣見攞唔到彩,唯有靜靜雞走開。

原圖嚟自網絡。