以前中學讀歷史都讀到,二戰初期英國對德國採取綏靖政策,助長納粹德國嘅氣焰,而當時嘅英國首相就係張伯倫喇。直至1939年9月納粹德軍入侵波蘭,張伯倫先至對德宣戰,張伯倫做咗8個月戰時首相,1940年5月就因為戰事失利下台,而接替佢嘅就係帶領英國打贏二戰、被譽為英國最偉大首相嘅邱吉爾。張伯倫下台半年,就因為胃癌响同年11月逝世,終年71歲。

綏靖政策當中最著名嘅事件,要數簽署《慕尼黑協定》。1938年希特勒施壓要求捷克斯洛伐克境內、人口以德意志民族為主嘅蘇台德地區由捷克斯洛伐克獨立出嚟,英法兩國為咗避免戰爭,就向捷克斯洛伐克施壓,希望以民族自決原則解決,但捷克斯洛伐克拒絕,令德國同捷克斯洛伐克瀕臨開戰邊緣。喺同年9月,德意英法四國首腦喺德國慕尼黑舉行會議,會上希特勒向張伯倫承諾今次係德國最後一次領土要求,張伯倫同意,四國首腦簽署《慕尼黑協定》,將蘇台德區轉讓俾德國。無份參加會議、無啦啦被割讓土地嘅捷克斯洛伐克,翌日拒絕接受《慕尼黑協定》,但英、法兩國向捷克斯洛伐克施壓,表明無義務協助捷克斯洛伐克,捷克斯洛伐克自知同德國實力懸殊,就同意割讓蘇台德區俾德國。

張伯倫簽署《慕尼黑協定》之後返到英國倫敦,宣稱自己此行帶嚟「一代人嘅和平」。但到咗1939年3月,德軍違反協議佔領捷克斯洛伐克全境,張伯倫隨即譴責德國,又發聲明一旦德國向波蘭開戰,一定會支持波蘭、向德國宣戰。同年9月1日,德軍不顧張伯倫嘅威嚇入侵波蘭,兩日之後英國終於向德國宣戰。

雖然張伯倫因為綏靖政策而受到唔少批評,但亦都有人分析認為英國當時並無足夠戰力同納粹德國開戰,再加上美國採取孤立主義,英國採取綏靖政策、爭取時間備戰亦係無可奈何嘅做法,而張伯倫出任財政大臣同首相期間,亦曾經多次增加軍費開支。

原圖取自網絡。