11月9日，對德國人嚟講可以話係一個好特別嘅日子，1918年德意志帝國崩解、威瑪共和成立，1989年柏林圍牆倒下都係响呢一日發生，據講喺東西德統一之後，亦一度諗住將呢一日訂為國慶日，但考慮到1923年嘅啤酒館政變（11月8至9日）同1938年水晶之夜都喺呢日發生，最後就將10月3日兩德統一呢日訂為國慶，而唔係11月9日。1938年發生嘅水晶之夜可以話係猶太人慘痛嘅一夜，亦係納粹德國屠殺猶太人嘅開始。

話說响1938年10月28日，納粹德國喺毫無預警嘅情況下，驅逐境內1.7萬猶太人去波蘭，但起初波蘭拒絕收容，呢班猶太人就滯留响德國同波蘭嘅邊境。一位住喺法國巴黎嘅德國猶太人格林斯潘收到屋企人寄俾佢嘅信，提到被驅逐出境時嘅慘況。格林斯潘就去搵德國駐巴黎大使館秘書長馮·拉特求助，但馮·拉特拒絕。到咗11月7日，求助無門嘅格林斯潘一氣之下向馮·拉特開咗3槍。延至11月9日，馮·拉特最終不治。諷刺嘅係，馮·拉特曾經因為同情猶太人而被調查。

馮·拉特嘅死訊傳到柏林之後，納粹德國就以此煽動反猶太主義，並且喺11月9日當晚展開瘋狂報復，近百名猶太人死亡，大量猶太教堂同商店被毀，由於當晚周圍都係玻璃，就好似破碎水晶咁，所以呢晚就被稱為「水晶之夜」喇。

原圖取自網絡。