二戰期間日本扶持嘅中國傀儡政權政府主席汪精衛,喺1944年11月10日逝世,終年61歲,而佢嘅死亡據講係同佢幾年前一次遇刺造成嘅創傷有關。

話說喺1935年11月1日,國民黨响南京召開四屆六中全會,晨光通訊社記者孫鳳鳴因為不滿國民黨唔抗日,計劃行刺蔣介石,但當日蔣介石因為覺得場面混亂、容易生事故,所以就留咗喺休息室,孫鳳鳴於是轉移目標,向當時係國民政府行政院長兼外交部長嘅汪精衛連開三槍,打中汪精衛嘅左頰、左臂同後背脊椎骨。孫鳳鳴隨即被捕,汪精衛經搶救之後,左頰同左臂嘅子彈順利取出,而背部粒子彈就始終無法取出,一直留喺汪精衛身體入面,直至多年後鉛毒擴散。

汪精衛曾經响日本接受治療,但都係醫唔好,最終响1944年11月10日,喺日本帝國大學附屬醫院病房內逝世,終年61歲,其後日軍將汪精衛遺體運回南京,汪偽政權政府官員將汪精衛安葬喺梅花山、孫中山陵園附近。抗戰勝利後,南京人民對汪精衛埋葬喺梅花山好不滿,紛紛要求剷除,喺輿論壓力之下,蔣介石派人炸毀墓園,又將汪精衛遺體火化。

原圖取自網絡。