達之路係又一城、又一村附近一條主要道路,但估唔到「達之路」呢個名原來係取自一位商人個名。呢位商人叫余達之,係香港一位著名糖薑廠商人,係香港糖薑貿易有限公司總經理同濟隆糖薑廠司理,將香港嘅糖薑推銷到海外。此外,佢亦做過市政局議員,曾獲頒授太平紳士同OBE勳銜。

喺1920年代,香港政府開發九龍,推出九龍塘花園城市計劃,發展低密度住宅區,成為洋人聚居嘅地方,而位於九龍塘西面嘅又一村一帶當時仍然係一片荒地。但余達之認為應該要有一個屬於華人嘅高尚住宅區,於是佢响1947年趁住同其他廠商去英國參加工展會嘅機會,獲瑪麗王太后接見,期間提出佢呢個諗法。余達之回港6個月之後,就正式向時任港督葛量洪提出建屋計劃,由余達之出資,以九龍塘花園城市為藍圖興建又一村。

由於余達之鍾意花卉,所以區內嘅道路都以花卉嚟命名,包括牡丹路、海棠路、玫瑰街、玉蘭路、壽菊路、丹桂路等等。後來為咗紀念余達之倡建又一村,達之路就以佢個名嚟命名喇。

圖為余達之、達之路近照,取自網絡。