要喺一條寬闊嘅河上面起一條橋唔係易事,辛苦起完之後又要親手毀咗自己嘅心血,更加唔係個個都落到手。阿史講緊嘅係錢塘江大橋嘅設計師、有「中國現代橋樑之父」稱號嘅茅以昇嘅故事。點解佢起好錢塘江大橋之後又要毀咗佢,一於繼續睇落去喇。

喺上世紀30年代,內地嘅建築技術尚未成熟,鋼鐵造嘅大橋都係外國人設計建造嘅,直到茅以昇成功興建咗錢塘江大橋,先至打破外國人嘅壟斷局面。錢塘江地理環境複雜,每月都有潮漲且江水洶湧,河底嘅淤泥又滑又厚,故此杭州有句歇後語:「錢塘江造橋——辦不到」,但偏偏喺錢塘江上造橋嘅任務落咗喺茅以昇身上。1933年,茅以昇主持設計錢塘江大橋,外國橋樑專家都睇死中國人無辦法獨自起得成,但茅以昇只係用咗兩年半、使咗160萬美元,就成功完成一條雙層結構,上通汽車下通火車嘅錢塘江大橋。

可惜錢塘江大橋通車無幾耐,茅以昇就收到指令話要炸毀大橋,以防被日軍佔用。茅以昇雖然心痛心血,但為咗抗日,佢毅然執行命令。直至抗日戰爭結束,茅以昇憑住之前保存好嘅橋樑資料,重新修復錢塘江大橋。

圖為茅以昇同錢塘江大橋,原圖嚟自網絡。