喺中國嘅抗日戰爭歷史裡面,除咗有中國人抵禦外敵嘅事蹟,仲有一名加拿大外科醫生白求恩嘅默默貢獻,甚至犧牲生命。今日係佢逝世80周年,等阿史同大家一齊回顧佢嘅生平。

白求恩全名Henry Norman Bethune,佢曾經加入加拿大皇家海軍做軍醫,參與過第一次世界大戰嘅救援工作。之後,白求恩輾轉去咗西班牙,仲發明咗世界上第一種運輸血液嘅方法,同埋建立流動捐血站嘅雛形。1937年,白求恩遇到中國教育家陶行知,得知中國啱啱經歷咗七七事變,正展開抗日戰爭。次年,白求恩義不容辭去咗中國,走上前線做戰地醫生。白求恩除咗喺戰場救死扶傷之外,仲致力於編寫醫療圖解手冊、製作各種醫療器材、訓練護理人員等,以降低傷員嘅死亡率同殘廢率。

有一次,白求恩做緊手術,遇到日軍逼近,哨兵催促白求恩儘快撤離,白求恩只係加快手術速度並無離開。期間,佢不慎被碎骨刺傷手指,但白求恩當時只係將手指浸落消毒液度粗略處理,堅持做完手術先撤退。而就係因為呢個小傷口,未經過妥善處理再次裂開,導致白求恩為另一名傷者做手術嗰陣被細菌感染,最終患上敗血症。白求恩嘅病情惡化得好快,最後喺1939年今日去世。

原圖嚟自網絡。