長沙可以話係除咗南京之外，另一個响二戰期間受到嚴重破壞嘅中國城市。事件本來緣於當時國民黨當局為抵禦日寇進犯，採用焦土政策制定咗焚燒長沙嘅計劃，但點知喺計劃實施之前，因為一系列偶然因素令到火災失控，最終導致嚴重傷亡同經濟損失。

話說喺1938年10月尾，武漢淪陷，國民黨政府決定喺日軍進入長沙之前，實行「焦土政策」，焚毀長沙全城，阻止日軍取得軍事物資。11月8日，日軍攻入湖南，又轟炸長沙同衡陽。11月11日，蔣介石密令湖南省政府主席張治中，指示準備焚毀長沙。

張治中搵嚟警備司令酆悌同省保安處長徐權制訂焚城計劃，列明起火材料、命令、信號、秩序，成個計劃由警備司令酆悌負總責，警備第二團團長徐昆任總指揮、市社訓總隊副總隊長王偉能同許權任副總指揮。張治中又批示喺13日朝早4點前完成準備，等待檢閱。

之不過到咗13日嘅凌晨2點幾，長沙南門口外嘅傷兵醫院突然起火，許權確認係意外之後，致電警察局局長文重孚要求救火，但文重孚就答覆警察同消防員已經撤離，又已經將消防車嘅水換成汽油，以致無法撲救大火。另一方面，城內嘅警備司令部眼見出面起火，以為係信號，就開始焚城。

由於焚城計劃嚴格保密，當時焚城係由意外觸發，再加上發生响深夜，老百姓由夢中驚醒逃生，有好多人被活活燒死，亦有唔少人係逃生嘅時候喺擠擁環境下被人踩死、被車壓死，最終導致超過3萬人死亡。呢場大火最終燒咗5日5夜先至熄滅，令全城超過9成房屋被燒毀，超過2000年歷史嘅文化古城被徹底破壞。事後酆悌、徐昆同文重孚被逮捕，起初被判處幾年監禁，但喺蔣介石審批之下，法庭改判槍決，而張治中就因為用人不當遭到撤職。

原圖取自網絡。