喺2010年11月13日，被譽為緬甸「民主女神」嘅昂山素姬獲釋，結束此前21年內斷斷續續、長達15年嘅軟禁。2012年，昂山素姬帶領全國民主聯盟參加緬甸國會補選，贏得45席中嘅43席；到咗2015年大選，全國民主聯盟獲得超過九成嘅選票，得以執政，昂山素姬响2016年擔任國務資政，成為緬甸實質掌權嘅最高領導人，但近年佢就因為緬軍種族清洗羅興亞人事件，而受到西方社會猛烈批評，甚至國際間有聲音認為應該褫奪佢嘅諾貝爾和平獎。

昂山素姬出生於1945年，父親係帶領緬甸結束英國殖民統治嘅「國父」昂山將軍。昂山素姬讀完中學之後去英國讀書，同英國人阿里斯（Michael Aris）結婚、組織家庭。直至1988年，昂山素姬因為母親病重而返回緬甸，同年發生「8888民主運動」，昂山素姬基於其父嘅聲望而受到人民擁戴，同年佢組建「全國民主聯盟」推動緬甸民主，其後急速壯大，成為緬甸最大黨。

但到咗1989年，緬甸軍政府就以煽動騷亂嘅罪名軟禁昂山素姬，喺其後21年裡面，足足有15年時間都被軟禁，期間丈夫患癌，佢憂慮無得返回緬甸，而選擇唔去英國見丈夫最後一面。直至2008年，終於出現轉機，緬甸因為長期受西方經濟制裁，導致經濟極差，軍政府被迫宣布緬甸民主化，制定新憲法。2010年11月昂山素姬獲釋，之後佢帶領全國民主聯盟參加大選，得以執政。

原圖取自網絡。