秋天起，大閘蟹正當造，亦都係好多港人嘅心頭好。阿史今日就同大家介紹吓「大閘蟹」呢個名點嚟喇。

我哋平時食嘅大閘蟹，學名叫「中華絨螯蟹」，之所以又叫做「大閘蟹」，其中一種講法係同佢嘅捕捉方法有關嘅。蟹除咗可以釣同網捕，仲可以用籪（讀：段）嚟捉嘅。籪即係插喺水入面嘅竹柵，啲人就會用籪去閘住啲蟹，夜晚喺個籪上面掛燈仔，啲蟹喺夜晚見到啲光就會沿住個籪向上爬，啲人只要留意住盞燈，就可以捉到好多蟹，吳語方言就會叫呢啲蟹做「閘蟹」，而陽澄湖嘅蟹出名大隻，所以就叫加上個「大」字，叫做「大閘蟹」喇。

原圖取自網絡。