慈禧太后出名心狠手辣，傳聞死喺佢手下嘅人多不勝數。不過，即使係咁，慈禧亦有後悔殺錯嘅人，呢個人就係被稱為「中國史上第一个殉職的記者」——沈藎。

沈藎曾經參與過革命黨自立軍嘅起義，起義失敗之後逃入北京，早就被慈禧視為眼中釘。之後，清政府同俄國訂立《中俄密約》草案，而就喺簽訂前兩日，沈藎喺天津嘅報紙度公開密約內容，引起全國譁然。1903年7月，沈藎被捕，新仇舊恨之下，慈禧命刑部即刻處死沈藎。刑部堅持要經過審訊、查清案情，但慈禧唔聽，下詔杖斃沈藎。據講，刑部為此特製咗一塊大木板，打到沈藎血肉橫飛，成身得返副骨頭。行刑者一度以為佢死咗，點知沈藎仲講到嘢，話：「何以還不死，速用繩絞我。」

雖然沈藎被杖斃，但清廷一直唔公開佢嘅罪狀，令佢嘅死因宜家仍備受猜疑。而呢個消息亦震驚中外，一時間慈禧受盡中外輿論責備，《泰晤士報》駐華記者莫理循更將慈禧叫做「那個該殺的兇惡老婦人」。《大公報》報道話，各國公使夫人喺覲見慈禧太后嘅時候都為沈藎喊冤，慈禧亦頗有悔意，表示自己已面諭廷臣，嚴拿革命黨人，但千祈唔可以株連良善，以免喪失人心。

圖為慈禧同沈藎，原圖嚟自網絡。