上個禮拜同大家講咗中國第一個「木乃伊皇帝」耶律德光，唔止佢自己係傳奇皇帝，佢媽媽嘅故事都好有傳奇色彩，佢就係史上斷臂殉夫、有「斷腕太后」之稱嘅述律平。

話說喺耶律德光爸爸、遼國第一任皇帝耶律阿保機仲在生嘅時候，述律平已經係個賢內助，唔單止多次幫阿保機統兵作戰，仲積極為阿保機網羅人才，可以話係個響噹噹嘅巾幗英雌。

阿保機死後，述律平就以皇后身份掌握軍國大權，當然會有啲老臣子唔服、搞搞震。於是述律平以傳統嘅部族禮儀為由，下令佢哋為阿保機殉葬。當時有個漢人就走出嚟反駁述律平話：「親近之人莫過於太后，太后為何不以身殉？」述律平聽完、都唔同佢多囉嗦，隨即手起刀落斬咗自己隻右手落嚟，放喺阿保機棺內。述律平話佢嘅仔女仲細，未係時候能夠離開母親，暫時無辦法落去陪阿保機，唯有以臂代身殉葬。呢種果斷同勇氣真係唔係個個都有，阿史都要寫個服字俾佢。

原圖嚟自網絡。