前排講填海提起，灣仔鵝頸橋一帶以前有個寶靈城，寶靈城係由香港第四任總督寶靈爵士响1850年代建成，而對面海油麻地嘅寶靈街就係以呢位港督命名，但原來港島嗰邊都曾經有一條以寶靈爵士個名命名嘅街道，今次就介紹吓呢段故。

話說，寶靈爵士1854年上任港督，佢任內致力開發土地，將黃泥涌道至海邊一帶低窪地填成平地，建成寶靈城。另外佢又將中區嘅海旁道路擴展，呢條路就命名為「寶靈海旁道」喇。之不過到咗1889年，中區開始填海工程，翌年英國干諾王子訪港，為中區填海立石，當時主持典禮嘅署理港督菲林明（又譯：傅林明）宣布，填海之後闢成嘅兩條大馬路會以干諾王子同港督德輔個名命名。原本嘅寶靈海旁道就不復存在，到咗1909年政府就將油麻地第八街改名做寶靈街，彌補返取消寶靈海旁道對寶靈爵士嘅不敬。

原圖取自網絡。