詩人戴望舒曾經嚟過香港做主編,佢嘅新詩亦為香港文學界所推崇。而佢嘅文學、翻譯作品得以保留,要多得佢嘅作家老友施蟄存。施蟄存同戴望舒係好好嘅朋友,好到咩地步?施蟄存喺戴望舒逝世後依然會去探戴媽媽,連戴望舒嘅身後事,施蟄存都有幫手處理,更將佢嘅遺作整理發佈。

施蟄存同戴望舒係大學同學,兩人因同樣喜愛文學而交好,戴望舒更同施蟄存嘅妹妹拍過拖。雖然呢段戀情未能開花結果,但就令戴望舒寫出〈雨巷〉等唯美詩篇,而施蟄存同戴望舒嘅友誼亦無因此受影響。之後戴望舒被國民黨通緝,臨行前將自己嘅一批書稿交俾施蟄存保管,加上後嚟戴望舒因哮喘過身,保存呢批手稿就從此成為施蟄存嘅一個重大責任。

戴望舒生前除咗文學創作,亦有翻譯外國文學,施蟄存為咗令戴望舒嘅心血得以傳世,努力整理戴望舒翻譯嘅《洛爾迦詩鈔》出版。文革期間,戴望舒嘅作品唔能夠出版,亦有遺失,施蟄存就四處搜集戴望舒嘅遺稿。佢一邊幫手整合、編輯,一邊尋求適當嘅時機拜託出版社出版,對戴望舒嘅譯作得以保留、發表盡心盡力。

圖為施蟄存同戴望舒,原圖嚟自網絡。