今時今日,聽歌成為現代都市人嘅日常,都係多得愛迪生喺1877年發明咗留聲機,咁先開創咗紀錄聲音嘅先河。不過,原嚟愛迪生嘅初衷並唔係想發明留聲機,而只係想記錄電話傳送聲音嘅過程,結果就無心插柳咁發明咗留聲機。

愛迪生發明出嚟嘅第一代滾筒留聲機,原理就係利用聲波震動嚟令針跟住震動,然後針就會喺圓筒上面嘅錫紙度刻低聲波嘅波形、軌跡。等圓筒轉完一圈就錄完一段錄音,想聽返呢段錄音,只要將針放返原位,再攪動滾筒就得。隨住之後不停改良、演變,留聲機由最初嘅圓筒變成蟲膠唱片、黑膠唱片、CD、MP3等,越嚟越方便,聲音亦越嚟越立體、還原。

圖為愛迪生同滾筒留聲機,原圖嚟自網絡。