近期社會事件蔓延到各間大學校園,位於馬料水嘅中大近排更頻頻見報,令好多市民都非常關注中大嘅情況。不過話時話,大家都知道中大景色優美,當中最出名嘅景點梗係要數新亞書院嘅合一亭,年中吸引唔少市民同遊客慕名上山一遊,唔少遊客仲將呢度稱為香港嘅「天空之鏡」。
合一亭喺2003年12月落成,由棉紗大王女兒伍宗琳捐贈、建築師陳惠基設計而成。佢曾被前任中大校長金耀基稱之為「香港第二景」,其興建係為咗紀念新亞書院創辦人錢穆同佢所著嘅〈天人合一論〉。錢穆認為,「天」同「人」係分唔開嘅,天命就表露喺人生上,離開咗人生,無從講天命。反之,離開天命,亦無從講人生。
雖然叫做「亭」,但合一亭嘅設計其實有啲似個巴士站上蓋,亭頂透明,亭外牆上刻有錢穆嘅〈天人合一論〉同「天人合一」印章。合一亭前面有水池,旁邊種有竹樹、設有石凳,可以遠眺吐露港,近睇又可以喺池水中見到樹嘅倒影,營造出水天一色嘅景色,充分展現咗天人合一嘅意境。
原圖嚟自網絡。