今日就係區議會選舉投票日,趁呢個機會同大家介紹吓香港區議會嘅歷史喇。話說喺1980年,港英政府發表咗份《香港地方行政模式》綠皮書,就地方行政計劃諮詢公眾意見,翌年再發表白皮書公布計劃,包括喺全港18區設立區議會,協調政府喺地區層面提供嘅服務同設施、確保政府盡快回應地區需要及問題,以及鼓勵市民參與地區事務。

區議會喺1982年正式成立,合共有490名區議員,當中包括166名官守議員、135名委任議員、132名民選議員同57名當然議員(30名市政局議員同27名鄉事委員會主席),各區區議會主席由政務專員擔任。

多年嚟,區議會嘅組成方法亦經歷多次轉變。1985年區議會取消所有官守議席,大幅增加民選議員數目,而各區區議會主席亦改由議員互選產生。1994年,區議會取消所有委任議席,全港373名區議員當中有346名區議員由地方選區選出,其餘27個議席屬當然議員,由新界各區鄉事委員會主席出任。

原圖取自網絡。