上禮拜警方喺理工大學校園外播歌,其中有一首經典嘅畢業歌——李克勤嘅〈告別校園時〉,令阿史諗起自己當年中七畢業就係唱呢首,再次聽返真係勾起唔少中學年代嘅回憶。〈告別校園時〉係李克勤喺1991年出嘅歌,收錄喺《雨中街頭劇》專輯裡面。呢首歌唱出嗰種曾經好期待放學、放假甚至畢業,但一到畢業真係要同同學老師講bye bye又突然好唔捨得、感到前路茫茫嘅心情,可以話係90年代必揀嘅經典畢業歌之一。

李克勤啱啱出道嗰陣,除咗唱校園歌之外,亦有參與拍攝青春劇,無綫1988年嘅《不再少年時》就由李克勤主演,佢仲有份唱入面嘅主題曲同插曲添。

講開畢業歌,唔同年代、唔同學校甚至唔同人心目中,可能都有屬於自己嘅一首,唔知大家當年嘅畢業歌又係邊首呢?

原圖嚟自網絡。