講到近排喺新聞出現得最頻密嘅武器之一,一定係弓箭,而歷史上後唐嘅太祖武皇帝李克用同弓箭都好有緣。李克用自己擅長箭術;臨終前又交低三支箭俾個仔,叫佢幫自己完成三個遺願;就連自己嘅畫像都鍾意人哋幫佢話射箭嘅樣。究竟點解?睇落去你就知。

李克用本身姓朱,因為父親有軍功,被唐懿宗賜「李」姓,之後嘅後代亦一直改姓李。李克用天生一隻眼失明,但年紀輕輕就驍勇善戰,好快做咗河南節度使,威震一方。佢做咗節度使之後,淮南節度使想知李克用係咩樣,於是派咗個畫工扮成商人去偷畫李克用嘅畫像。

點知個畫工好快被抓住,李克用起初好嬲,但又想睇吓個畫工點樣將獨眼嘅自己畫得靚仔啲,就叫個畫工照畫自己。個畫工為咗保住條命仔,梗係要諗計仔掩蓋李克用隻獨眼。第一次,佢畫咗一幅李克用揸住把八角扇搧風嘅畫,扇嘅邊緣啱啱遮住李克用盲咗隻眼。李克用唔收貨,覺得畫工喺度擦自己鞋。畫工又畫咗一幅,今次係李克用眯眼瞄準目標,準備拉弓射箭嘅樣,眯咗嗰隻眼啱啱就係李克用嘅獨眼。李克用一睇,非常滿意,唔單止放咗畫工,仲賜埋賞金俾佢安全返屋企添。

圖為秦沛飾演嘅李克用,原圖嚟自網絡。