唔知大家宜家仲有無聽電台廣播？喺以前電視仲未普及、又未出現咁多網上娛樂嘅年代，開收音機聽電台廣播係好多香港人嘅主要娛樂。而講起廣播，就不得不提有「播音皇帝」之稱嘅鍾偉明。鍾偉明以一把雄渾鏗鏘嘅靚聲，演活咗無數廣播劇角色，縱橫廣播界成62年，連前任廣播處長張敏儀都話佢喺廣播界嘅地位無人能及。

鍾偉明17歲入行，曾經喺香港各間電台開過咪，包括麗的呼聲電台、商業電台、香港電台，又擔任過播音製作嘅唔同職位，亦曾加入美國新聞處。不過講到最為人所津津樂道嘅，梗係鍾偉明聲演過嘅多齣廣播劇喇。鍾偉明對每一個佢演出嘅角色都好認真對待，佢可以為咗做好〈郭林探案〉裡面嘅郭林探長，而接受三個月嘅警察訓練，體驗郭林探長可能經歷過嘅訓練去塑造呢個角色。鍾偉明又會為咗以聲演繹武俠小說而拜黃飛鴻徒孫朱愚齋為師親身學功夫，更加可以將武俠小說入面嘅武功招式生動演繹出嚟。正正係因為鍾偉明呢份專業精神，令佢成為廣播界巨星，更榮獲MBE勳銜同埋「廣播成就榮譽獎」。

原圖嚟自網絡。