台灣金馬獎係好多華人演員努力嘅目標，不過要攞獎，除咗靠演技，仲要睇機遇嘅，好劇本、有得發揮嘅角色都係攞獎關鍵。而當年呢位小朋友就真係集齊演技、機遇於一身，9歲初登大銀幕就已經勇奪金馬獎最佳男配角，隔年又攞咗香港電影導演會年度大獎嘅最佳新演員金獎，更加喺之後嘅香港電影金像獎攞咗最佳男配角同最佳新演員，可以話係後生可畏。雖然呢位小朋友宜家已經淡出娛樂圈，但佢當年喺呢部戲嘅出色表演依然為人所樂道，佢就係童星吳澋滔。

當年得9歲嘅吳澋滔第一次拍戲就擔任重要角色，佢喺2006年參與由譚家明導演，郭富城、楊采妮主演嘅電影《父子》，並飾演戲中郭富城嘅仔仔。喺戲入面，郭富城飾演一個爛賭爸爸，爭落大耳窿周街數、逼走老婆楊采妮不突止，仲要教吳澋滔去偷嘢養自己。吳澋滔被逼做賊仔，好彩佢天性善良，無學壞之餘仲生生性性長大成人。吳澋滔憑住呢套戲橫掃各大頒獎典禮嘅獎項，如果照住呢個勢繼續落去，吳澋滔成為影帝應該都係遲早嘅事。之不過，同係演員嘅媽媽司馬燕就認為吳澋滔要以學業為重，所以《父子》之後都無再俾佢拍戲。後嚟，吳澋滔只係參與過2009年電影《阿童木》嘅配音工作，從此專心讀書升學，逐漸淡出娛樂圈。

圖為《父子》劇照，原圖嚟自網絡。