啱啱個禮拜日係區議會選舉投票日，唔少票站都「賓虛咁嘅場面」，好多市民打晒蛇餅入票站投票，亦難怪今屆選舉嘅投票率超過七成，創歷届選舉新高。

講起「賓虛咁嘅場面」，好多人都知係用嚟形容好墟冚、宏大嘅場面，但當中嘅「賓虛」係點嚟嘅呢？「賓虛」其實係一個角色嘅名，出自1959年上映嘅一齣美國電影《賓虛》（Ben-Hur）。呢齣戲就巴閉囉，佢創下咗最高製作費同最大規模嘅紀錄。嗰陣仲未有電影特技，而為咗呈現戲裡面萬人空巷、盛大非凡嘅「戰馬車生死大賽」，製片公司請咗超過10000個臨時演員上陣，其震撼場面可謂空前絕後。由於《賓虛》成日出現人山人海嘅場面，所以香港人就以「賓虛」嚟形容大陣仗同個場面好多人。

圖為《賓虛》劇照，原圖嚟自網絡。