阿史又有舊同學準備結婚，佢仲好自豪咁話：「娶妻當得XXX（佢未來老婆個名）」。呢句說話大有來頭，原本係出自漢代光武帝劉秀之口，佢嘅原話係「仕宦當作執金吾，娶妻當得陰麗華。」

話說劉秀後生嗰陣去咗新野（今河南一帶），聽聞陰麗華生得靚就已經對佢傾心。之後到咗長安，劉秀又見到執金吾（一個官職）嘅車馬排場好壯觀，所以就發出慨歎話做官就要做執金吾，娶妻就要娶陰麗華。呢兩個願望可以話係劉秀年少時期嘅目標，只不過後嚟劉秀當然唔止做執金吾喇，而佢又真係得償所願，娶咗陰麗華為妻，可謂愛情事業兩得意。

事實證明，陰麗華真係娶得過，佢唔止樣靚，《後漢書》仲話佢「恭儉，少嗜玩，不喜笑謔。性仁孝，多矜慈」，非常符合一國之后嘅氣質。最重要嘅係，陰麗華喺劉秀貧賤嘅時候已經下嫁於佢，兩夫妻共過患難。之後得知劉秀需要借助郭家嘅勢力先得天下，加上郭氏有孕，陰麗華又將皇后讓俾郭氏，咁大度真係唔係個個女人都做到。

圖為光武帝同陰麗華劇照，原圖嚟自網絡。