大嶼山石壁水塘响1963年今日正式落成啟用，係當時香港儲水量最高水塘，而家就僅次於萬宜水庫同船灣淡水湖，係香港嘅第三大水塘，而水壩南面就係高度設防嘅石壁監獄。唔講唔知，喺石壁水塘建成之前，原本有4條村落，包括石碧大村、墳背村、崗貝村同坑仔村，統稱「石碧鄉」，村民世代務農維生。

直至1950年代尾，港英政府覓地興建水塘，就睇中咗大嶼山石碧鄉所在嘅石壁山谷，呢度三面環山，而且山谷又深又闊，非常適合興建水塘，於是就向石碧鄉村民商討搬遷，提出兩個方案，包括搬到去大浪灣，或者搬到政府喺荃灣興建嘅石碧新村，最後大部分村民都選擇咗後者。

原圖取自網絡。