美國總統特朗普已經簽署咗《香港人權與民主法案》,意味法案正式生效。呢條「法案」就要求美國國務卿之後每年「要審視香港嘅自治情況」,以評估係咪取消《美國——香港政策法》(又稱:《香港關係法》)中承認香港有別於中國內地城市嘅特殊地位。今次就同大家簡單講吓《香港關係法》係咩嚟。

1992年,因應香港將於1997年回歸中國,美國重新制定對港政策,於是國會就通過《香港關係法》。《香港關係法》嘅重點,係美國尊重香港回歸之後,仍作為「獨立關稅區」同世貿會員嘅地位,並於政治、經濟、貿易政策等方面,視香港為與中國內地完全唔同嘅地區;又繼續俾香港得到受多邊出口統籌委員會(COCOM)規管嘅敏感科技,以及承諾回歸唔會影響香港人去美國嘅簽證申請等等。

有本港經濟學者就曾分析稱,一旦美國唔再將香港視為獨立關稅區、給予香港稅務優惠,將會率先打擊香港本地製造嘅商品,更嚴重嘅係美國嘅盟友例如英國、澳洲等等效法嘅話,會打擊香港嘅國際金融中心地位。不過,亦有另一方面嘅意見認為,《香港關係法》表面上係是要「監察、保障」香港嘅「一國兩制」運作,但實際上係為咗保障美國喺香港嘅經濟利益,因為唔少美資金融機構都借助香港國際金融中心嘅優勢同地位,每年喺香港賺取可觀嘅利潤。

原圖取自網絡。