喺1975年今日,尖沙咀火車站最後一班列車响下晝2點55分開出;下晝4點,呢個承載厚重歷史嘅火車站正式關閉,隨即開始拆卸工程,到1978年完成拆卸,但就保留咗原火車站嘅鐘樓。上世紀80年代,政府又喺鐘樓一帶興建咗太空館、文化中心、商場等等。

尖沙咀火車站喺1911年開始動工、1916年落成,當時係九廣鐵路香港段嘅總站,喺上世紀60年代香港人口超過100萬,尖沙咀火車站開始不勝負荷,每逢大時大節都有大批市民喺度排隊等車,人龍長達一英里,於是港英政府就決定將總站由尖沙咀搬到去紅磡。新嘅紅磡火車站响1975年落成啟用,而尖沙咀火車站亦正式完成佢嘅歷史任務喇。

原圖取自網絡。