《鬼太郎》可以話係阿史細個時其中一套好鍾意睇嘅卡通片，尤其係睇鬼太郎同佢一班朋友一齊作戰，都會覺得好有趣。《鬼太郎》作者、日本漫畫家水木茂喺4年前今日，因為心臟衰竭逝世，享年95歲。

水木茂1922年生於日本鳥取縣境港市，據聞佢細個嘅時候就唔鍾意讀書，唯獨鍾意畫畫，於是就立志做一個漫畫家；照顧水木茂嘅婆婆不時都同佢分享一啲神怪故事，令佢對神怪題材寧舍有興趣，促使佢日後創作以唔少妖怪為題嘅漫畫。之不過，係佢21歲嘅時候，正直第二次世界大戰，水木茂被徵召入伍，佢所屬嘅小隊成員全部喺戰事中喪生，剩返水木茂一個倖存落嚟，而水木茂亦响戰事中失去左臂。

日本戰敗之後，水木茂曾經窮困過一段時間，做過魚販、做過三輪車夫，直至1957年開始創作畫劇，其後再轉行做漫畫家；1958年出版第一部漫畫《火箭人》，1959年就創作咗大家熟悉嘅《鬼太郎》系列，結果大受歡迎，多次拍成動畫。水木茂為咗回饋境港市，就免費開放《鬼太郎》版權俾水木茂大道嘅商戶使用，令水木茂大道已經成為《鬼太郎》嘅特色景點，係鳥取縣最具人氣嘅旅遊熱點之一。

原圖取自網絡。