唔講唔知,距離安徒生第一本童話集《給孩子們講的故事》出版,已經足足過咗184年。安徒生嘅童話相信係唔少人細個嘅啓蒙讀物,佢嘅經典作品〈醜小鴨〉、〈國王的新衣〉、〈賣火柴的小女孩〉等,陪伴住一代又一代嘅小朋友甚至大朋友。

據說安徒生細細個就鍾意睇書,尤其鍾意睇莎士比亞嘅作品,佢甚至會背低莎士比亞嘅劇本,呢啲劇本之後仲成為佢創作嘅元素添。1835年今日,時年30歲嘅安徒生,喺丹麥哥本哈根出版咗佢嘅第一本童話集《給孩子們講的故事》。雖然呢本故事集得61頁,但入面嘅故事既有趣,又帶有對社會、人性嘅批判,亦奠定咗安徒生往後嘅寫作風格。不過,同絕大多數作家嘅遭遇一樣,安徒生呢本童話集起初唔係咁多人睇好,甚至有人認為安徒生缺乏創作天分。好彩,安徒生並無因此而氣餒、放棄寫作,否則後世都睇唔到佢嘅優秀作品。

而講起將安徒生嘅作品介紹嚟中國,就不得不提文學家魯迅嘅弟弟周作人。早喺1908年,周作人就翻譯過安徒生嘅故事,仲讚佢嘅作品「天性自然,行年七十,不改童心」。

圖為安徒生同周作人,原圖嚟自網絡。