2013年7月美國底特律市政府向聯邦法院申請破產保護,同年12月獲批,底特律以負債180億美元,成為美國史上最大宗公共破產案。底特律曾經因為生產汽車風光一時,由20世紀初人口急速增加,直至1950年代人口達180萬,成為當時美國第五大城市,並且不斷向郊區擴展。

直到1960年代,情況開始有變。1967年底特律發生大規模騷亂,因為治安問題,富裕階層亦開始遷出;到咗1970年代,日本車興起,衝擊美國汽車產業,導致當地車企出現裁員潮、倒閉潮,令人口進一步減少。到咗2012年,底特律人口得返68萬,比起1950年代嘅高峰期銳減超過6成。隨住企業同人口外流,底特律逐漸出現荒廢蕭條,唔少基建同公共設施例如道路同管道都無人用,喺稅收減少之下,維修同管理呢啲基建對市政府財政造成沉重負擔。

喺底特律負債嘅180億美元當中,有90幾億美元就屬於退休市政員工嘅養老金和健康保險。喺法院批准破產保護之後,翌年11月底特律債務重組計劃獲法庭批准,豁免當中嘅70億美元債務,其後開始重建工作,逐漸重回正軌。

原圖取自網絡。