行政長官林鄭月娥上個禮拜就提到，會參考英國處理2011年倫敦騷亂嘅做法，成立獨立檢討委員會，檢視香港近期嘅社會事件。阿史今次就同大家介紹吓當年倫敦騷亂嘅前因後果，同當時英國政府做咗啲咩喇。

事緣喺2011年8月4日夜晚，一名29歲黑人男子達根（Mark Duggan）喺倫敦北部托定咸被警員槍殺，引起當地少數族裔社區不滿，獨立警察投訴委員會嘅解釋前言不對後語，觸發民眾上街示威抗議，其後演變成騷亂，蔓延到英國其他城市。有示威者焚燒警車、破壞商店，造成5億英鎊經濟損失。

喺5日嘅騷亂裡面，有約4000人被捕，事後獨立警察投訴委員會繼續調查達根嘅死因同警方執法問題，另一方面政府就成立「騷亂、社區與受害者委員會」，探討騷亂成因並提供建議，避免同樣事件再發生。委員會報告指出，參與騷亂嘅年輕人多數都係屬於貧窮階層，佢哋家庭教育不足，缺乏向上流動同改過自新嘅機會，再加上經常被警察針對，令佢哋對警察徹底失去信任，導致佢哋情緒爆煲、引發騷亂。委員會報告就提出多項建議，包括為學生提供更多就業支援、加強性格教育，以及改善警民關係，加強警員行使截查權透明度等等。

原圖取自網絡。