上個禮拜簡單講咗後唐皇帝李克用,今日就嚟講講佢麾下有名嘅十三太保。所謂嘅十三太保,係指李克用嘅親生仔李存勖,義子李嗣源、李嗣昭、李存信、李存進、李嗣本、李嗣恩、李存璋、李存賢、李存審、李存孝,同埋佢嘅部下史敬思、康君立。因為呢13個人都曾被封為太保,所以得名。而十三太保當中,最出名嘅就係李存孝,1982年有套《十三太保》嘅電視劇就係以李存孝為主角。

據《舊五代史》載,李存孝本名安敬思,精通騎射、驍勇善戰,打仗經常做先鋒,而且戰無不克,幫李克用贏咗唔少場仗,可以話係五代十國時期嘅一員猛將。不過,正因為李存孝咁打得,就遭嚟同係十三太保之一嘅李存信妒忌,屈佢通敵叛變。李存孝知道之後,鬱鬱不忿,又自恃戰功,真係走去叛變。結果李克用仲親自出兵討伐李存孝,李存孝臨死前向李克用請罪話自己被人中傷,又聽信讒言先會不得已造反。李克用雖然唔捨得處死李存孝,但最後都係將李存孝處以車裂之刑。

圖為黃日華飾演嘅李存孝,原圖嚟自網絡。