唔少國家同地區都想舉辦大型、國際性嘅運動會，以刺激當地經濟，而香港首次以東道主身份舉辦嘅大型綜合運動會，就係2009年嘅第五屆東亞運動會。

呢次運動會參賽嘅國家或地區共有9個，包括中國、朝鮮、蒙古、日本、韓國、中華台北、中國香港、中國澳門同關島。而呢屆嘅比賽項目亦增加至22項，其中有16項仲係奧運比賽項目添。主場之利下，香港喺呢一屆運動會裡面奪得26面金牌，當中仲包括足球，可以話係振奮全香港人嘅一次威水史。

不過，自從2013年天津主辦完第六屆東亞運動會之後，呢項經歷廿年嘅運動會就走入歷史。原因係日本同南韓都認為佢哋嘅職業運動員參賽太頻密，如果再要備戰東亞運動會，會影響佢哋參加其他國際賽事嘅狀態同表現，於是提出停辦，此提議亦都得到其餘7個國家同地區同意，東亞運動會從此成為絕唱。

圖為香港體育館外嘅東亞運動會吉祥物，原圖嚟自網絡。