早排大台嘅《牛下女高音》搵嚟一班甘草演員好似吳岱融、蔣志光、鄭敬基、曾航生、區瑞偉、韋家雄等擔大旗做主角，出乎意料咁大家對於呢個陣容搭配都好受落。甘草演員通常指一班有返咁上下戲齡，或者比較年長嘅演員，佢哋好多都係好戲之人，大部分甘草演員後生嗰陣仲係型男美女添。佢哋喺戲入面雖然無主角咁搶眼，但一部成功、好睇嘅作品就絕對唔少得佢哋。但點解呢類演員會用「甘草」嚟形容？原嚟同中醫有關。

甘草藥性溫和，中醫開藥嗰陣經常會喺藥方度搭一味甘草。皆因甘草既可以引導藥物直達病變部位，又可以調和各種中藥嘅功能，最重要嘅係無副作用，於是就有「無甘草，不成藥材」嘅講法。而甘草演員就同甘草嘅功效一樣，起住搭配各種角色、引導劇情發展、調和角色關係嘅作用。所以話呢，甘草演員係戲中不可或缺嘅一部分，正所謂「牡丹雖好，還須綠葉扶持」嘛。