喺4年前今日，前市政局議員杜葉錫恩逝世，終年102歲。杜葉錫恩1913年响英國出生，1951年以傳教士身份嚟到香港，為基層爭取權益、提供教育，服務香港超過40年。佢曾經接受訪問嘅時候提到，佢過去最快樂嘅經歷係同前港督麥理浩一齊打貪。

杜葉錫恩初初嚟到香港嘅時候，致力為基層提供教育機會，創辦咗慕光英文書院，一直出任校監，又曾經任教英文科，甚至定期捐出積蓄為貧窮學生助學。杜葉錫恩响1963年成功當選當時市政局議員，開始佢嘅從政之路。上世紀60年代，香港貪污問題嚴重，杜葉錫恩以市政局議員身份，不斷揭露警察同官員貪污嘅情況，並利用傳媒力量迫使港英政府正視問題，但當時杜葉錫恩嘅聲音得唔到港英政府正面回應，於是佢就去到英國倫敦，向國會議員同英國政府陳情。到咗70年代，麥理浩上任港督，願意聆聽杜葉錫恩嘅意見，又睇過杜葉錫恩多年來蒐集嘅證據，終於响1974年成立廉署打擊貪污。

杜葉錫恩由1963年做市政局議員做到1995年，當時司徒華同杜葉錫恩競爭觀塘北議席，杜葉錫恩選輸咗，1997至1998年杜葉錫恩獲委任為臨時立法會議員，之後逐漸退出政壇。

杜葉錫恩於1997年獲前行政長官董建華頒授大紫荊勛章。

 原圖取自網絡。