上個禮拜同大家講咗漢代光武帝點解會講「娶妻當得陰麗華」,有史友話想阿史講多小小陰麗華嘅故事,今日就等阿史找數喇。據載陰麗華係南陽新野人,出身名門,祖先係春秋時期嘅名相管仲,只不過後嚟因為管仲嘅七世孫去咗楚國陰地做大夫而改姓。

陰麗華喺光武帝劉秀仲未發圍嘅時候就已經嫁咗俾佢,之後劉秀登帝位,想話封陰麗華為后,但陰麗華知道劉秀係借助郭家嘅勢力先得天下,加上郭氏有孕,於是將皇后之位讓俾郭氏。有一年,陰麗華嘅母親同弟弟被盜匪劫殺,劉秀好傷心,覺得對唔住陰麗華,覺得陰麗華喺自己貧賤嘅時候就已經陪伴左右,又難為佢屈居做貴人,如今佢嘅屋企人都未嚟得切封爵就已經遭遇不測。於是劉秀決定追封陰麗華嘅父親同弟弟,等佢哋死後得以封侯。

劉秀一心想俾陰麗華做皇后,儘管郭氏無犯大錯,但劉秀就話佢「懷執怨懟,數違教令」而廢后,陰麗華最終得登后位。陰麗華死後亦同光武帝合葬,可見呢對帝后嘅感情之深厚。

圖為清代畫家吳友如所畫嘅陰麗華,原圖嚟自網絡。