1996年12月，時任美國總統克林頓提名奧爾布賴特出任國務卿一職，呢個提名喺翌年1月獲得參議院批准，奧爾布賴特於是成為美國首位女國務卿。

奧爾布賴特生於前捷克斯洛伐克首都布拉格嘅一個外交官家庭，佢細個嘅時候為逃避納粹，跟隨父母舉家逃到英國。1948年，奧爾布賴特又隨父母移民美國，之後曾任喬治城大學教授，專門研究美國同俄羅斯、東歐國家嘅關係，又出任過美國國家安全委員會委員、美國駐聯合國大使等職務。

奧爾布賴特非常重視美國同中國嘅關係。1999年5月，中國駐南斯拉夫大使館被美國戰機炸毀，導致3名中國人被炸死，20人受傷。事發當晚，奧爾布賴特為咗避免中方認為事件係美國蓄意轟炸，連夜親自率幾名軍方官員前往中國駐美大使館拜訪並致歉。美國總統特朗普上任後，曾發表「美國優先論」，批評奧巴馬政府「讓中國在經貿上佔了便宜，美國因而失去了對方的尊重」。奧爾布賴特就警告特朗普，話佢嘅做法只會令世界變得更混亂、危險。

奧爾布賴特曾先後5次訪華，其中喺2016年訪華交流時佢就講到，中美之間有共同嘅利益，應該繼續互相學習交流。當時佢仲引用孔夫子嘅名言，話「己欲立而立人」、「己欲達而達人」，佢認為孔子以最好嘅方式提出咗雙贏嘅倡議。

奧爾布賴特曾經表示，對任何一屆美國政府嚟講，中國太大，美國唔可以忽視中國，但亦都好難擁抱中國；兩國領導人嘅私人外交並唔足以改變政府嘅基本哲學。但奧爾布賴特認為，美國唔應該視中國為敵人，而係應該當期待中國嘅經濟改革成功。

原圖嚟自文匯報。