1935年嘅今日(12月9日),喺北京興起一個「一二·九」運動,呼籲停止內戰、共赴國難,同心對抗日本侵華。呢場愛國運動迅速得到全國學生嘅響應。

話說日本帝國主義展開侵華、佔領中國東北之後,繼續向華北進犯。1935年六、七月間控制當時嘅察哈爾省,指使漢奸殷汝耕建立傀儡政權——當時正值國民黨及共產黨處於內戰狀態,形勢膠著。

同年11月18日,北平各大中學校學生代表秘密成立北平學聯;12月6日,佢哋公開發表成立宣言,提出以反對日本帝國主義吞並中國華北為核心嘅9項政治綱領,呼籲停止內戰,共赴國難,團結全國各界民眾反抗日本侵略者。

去到12月9日,超過6000個北平各大中學校嘅學生走上街頭,向當時國民政府軍政部長何應欽請願,學生高呼「打倒日本帝國主義!」、「立即停止內戰!」等口號。此後,全國各地有心人亦都紛紛成立救國會,要求國民黨當局停止內戰,共同抗日。

原圖:新華社