日前講到喺1941年12月8日日軍正式進攻香港，英軍守咗18日之後，同年12月25日香港正式淪陷，開始咗三年零八個月嘅日據時期。喺守衛香港期間，有英軍就收到時任首相邱吉爾嘅命令：「唔可以投降，要全力摧毀日軍，拖住佢哋，爭取時間，絕不妥協、不放棄香港島，同中國人民戰鬥到最後」。但背後嘅故事係咪咁簡單呢？

喺二戰之前，英軍從未與日軍交戰；駐港英軍司令認為，英軍足夠精銳，日軍想贏冇咁易。當時，中國共產黨同國民黨都曾分別提出合作抗日，但都遭到英方拒絕。共產黨嘅抗日武裝力量東江縱隊港九大隊就提出，由港英政府提供武器彈藥，合作抗日，但港英政府就視佢哋係散兵游勇，結果不歡而散；而國民黨方面，英國政府就憂慮香港嘅統治權受到威脅，同樣拒絕合作抗日。因此英軍就憑住大約1.4萬名守兵，迎戰有3萬多兵力嘅日軍。

日軍由8號進攻香港之後嘅一個星期，呢場戰鬥就進入咗巷戰肉搏階段，於是就有上文提到嘅邱吉爾命令「拖住佢哋，爭取時間，絕不妥協」，但究竟爭取咩時間呢？原來喺戰前，英國政府對於香港防務嘅態度就好矛盾，採用嘅係最低防禦標準。因為丘吉爾首一早就講過，港呢個殖民地唯一任務就係拖住日本人，令新加坡得到增援，不但唔應該增加守軍，仲要減少兵力，避免喺香港消耗英軍實力。

所以香港戰事開打之前，香港只有駐守英軍同印度籍士兵萬幾人，加埋少少嚟自加拿大嘅部隊，結果短短18日就戰敗投降，同英軍當初估計可以守住港島一年相距甚遠。

圖為日軍轟炸香港，取自文匯報。