1977年嘅今日即12月10日，係內地570萬考生高考嘅大日子，呢場高考係內地經歷文革，中斷咗10年重新恢復高考制度嘅第一次考試，知識改變命運，中國幾代人嘅命運亦都由此而改變。

當時文化大革命啱啱結束無耐，實行嘅仲係推薦上大學制度；1977年8月，鄧小平召開咗一次科學教育工作座談會，唔少專家、學者都呼籲該年就恢復高考，雖然有意見認為時間上趕唔切，但鄧小平就拍板決定恢復高考，唔再搞推薦制。呢次會議之後兩個月，即係1977年10月，國務院就發文件正式恢復高等學校招生統一考試制度。

據統計，單係1977年同1978年兩屆嘅考生，就高達1160萬；唔講唔知，原來總理李克強、外長王毅等政要，以及導演張藝謀、畫家羅中立等名人，都係當年嘅考生之一。

圖為恢復高考後第一批大學生，取自新華社。